قصيدة ضحكة الوقت
ياضحكة الوقت خلينا نشوف ونعيد
تصحى عقولن تغط بليل غفلاتها
ننظر بعين البصيره والكلام الاكيد
مانعنز الراي للحروه وهقواتها
يظهر لنا فجرن ابيض يبهج المستفيد
يقشع ظلام العيون ويكشف اغطاتها
طول صباح النفوس اللي دجاها شديد
تمشي ولا عاد تدري وين وجهاتها
سير الدقايق يعقبنا سوات الحصيد
ياكل بالاعمار لين يحت ساعاتها
اللي مضى لو بغينا مارجع من جديد
والمقبلات الله اعلم ويش نياتها
تطوي الليالي مسافات الزمان البعيد
وتكشف لنا اللي مخفى وسط غباتها
تفنى الاوادم ولا احدن حقق اللي يريد
كلن رحل والمطالب دون غاياتها
آمالنا اللي رسمناها نروح وتبيد
وتبقى الاماني اماني في محلاتها
